தமிழிஷ்

நாள்தோறும் பெருகி கொண்டு இருக்கும் தமிழிஷ் பயனர்களுக்கு வணக்கங்கள். பயனர்கள் எண்ணிக்கை போன்றே தமிழிஷில் பகிரப்பட்டு வரும் இடுகைகளின் எண்ணிக்கையும் அதிகரித்து வருகிறது. பகிரப்படும் இடுகைகளை பயனர்களின் ரசனைக்கு ஏற்றவாறு அணுக வகைப்படுத்தி பல்வேறு பிரிவுகளின் கீழ் வழங்கி வருகிறோம். சூடான செய்திகள் என்ற பெயரில் செய்தி தளங்களில் இருந்து பகிரப்படும் இடுகைகளை தனியே வகைப்படுத்தி பட்டியலிட்டோம். உங்களிடம் அது மிகுந்த வரவேற்பை பெற்றது. இதன் தொடர்ச்சியாக சோதனை முயற்சியில் புதிய பகுதியை அறிமுகப்படுத்துகிறோம்.

இணைய உலகில் ஒவ்வொரு கால கட்டத்திலும் சில விஷயங்கள் முக்கியத்துவம் கொடுத்து அலசப்படுகின்றன. வலைப்பதிவர்களும் குறிப்பிட்ட விசயங்களுக்கு முக்கியத்துவம் கொடுத்து அதிகம் எழுதி வருகின்றனர். தேர்தல் நேரத்தில் அரசியல் விஷயங்கள் பரபரப்பாக தேடப்படுகிறது, எழுதப்படுகிறது. திரைப்படங்கள் வெளியாகும் கால கட்டங்களில் அத்திரைப்படம் குறித்த விஷயங்கள் பரபரப்பாக தேடப்படுகிறது, எழுதப்படுகிறது. அந்தந்த கால கட்டத்தில் பரபரப்பாக உள்ள விசயங்களை தமிழிஷ் பயனர்களும் தமிழிஷில் தேடி வாசிக்கின்றனர். தமிழிஷில் பகிரப்படும் இடுகைகளின் சதவீதத்தில் பரபரப்பாக உள்ள விசயங்களில் உள்ளடக்கிய இடுகைகளும் குறிப்பிடத்தகுந்த அளவில் உள்ளன.

இதனையொட்டி ஒவ்வொரு காலகட்டத்திலும் தமிழிஷில் அதிகம் தேடி வாசிக்கப்படும், இணையத்தில் அதிகம் எழுதப்படும் விஷயங்களை உள்ளடக்கிய இடுகைகளை தனியே பிரித்து காட்டுவது என்று முடிவு செய்து உள்ளோம். இதனால் அந்தந்த நேரத்தில் பரபரப்பாக உள்ள விசயங்களை தமிழிஷ் பயனர்கள் எளிதில் வாசித்து கொள்ள முடியும்.

தமிழிஷ் சூடான சங்கதி!. இது ஒரு சோதனை முயற்சி.

தற்போது வேட்டைக்காரன் திரைப்படம் குறித்து அதிக இடுகைகள் பகிரப்படுகின்றன. பயனர்களாலும் வாசிக்கப்படுகின்றன. புதிய பகுதியின் ஆரம்பமாக வேட்டைக்காரன் திரைப்படம் தொடர்பாக பகிரப்படும் இடுகைகள் தனியே பிரித்து பட்டியலிடப்படும்.

சுட்டி : http://www.tamilish.com/special

இதைத் தொடர்ந்து ஒவ்வொரு காலகட்டத்திலும் பரபப்பாக எழுதப்படும் விஷயங்களை உள்ளடக்கிய இடுகைகள், தமிழிஷ் சூடான சங்கதி! பகுதியில் பட்டியலிடப்படும். இது தமிழிஷ் பயனர்களை கவரும் என்று நம்புகிறோம்.

இது குறித்த உங்கள் கருத்துக்களை support@tamilish.com என்ற முகவரிக்கு மின் மடலிடவும்.

நன்றி.

வலைப்பதிவுகளில் வில்லங்க மென்பொருள்கள் (malicious software) பரவுவது தொடர்பாக பயனர்கள் எமது கவனத்திற்கு கொண்டு வந்துள்ளனர். சிலர் தமிழிஷ் மூலம் வில்லங்க மென்பொருள்கள் பரவுகிறதா? என்று சந்தேகமும் எழுப்பி உள்ளனர்.

இணையத்தில் பிரபல தளங்களை குறிவைத்து தாக்கி அவற்றின் பாதுகாப்பை உடைத்து அதன் மூலம் பயனர்களுக்கு வில்லங்க மென்பொருளை பரப்புவது பரவலாக நடந்து வருகிறது. இதனை எப்போதும் கவனத்தில் கொண்டு கண்காணிப்புடன் தமிழிஷ் செயல்பட்டு வருகிறது. இந்த நிலையில் தமிழிஷ் தளத்தால் சில வலைப்பதிவுகளில் வில்லங்க மென்பொருள்கள் பரப்ப படுவதாக கூகிள் பாதுகாப்பு எச்சரிக்கை அறிவிப்புகளில் தெரிவிக்கப்பட்டு உள்ளதாக தமிழிஷ் பயனர்கள் தகுந்த நேரத்தில் எச்சரித்து மின்னஞ்சல் அனுப்பி இருந்தனர். உடனடியாக தமிழிஷ் தளத்தின் இயக்கம் நிறுத்தப்பட்டு, தமிழிஷ் தளம் முற்றிலும் சோதிக்கப்பட்டது. எவ்வித வில்லங்க மென்பொருள்களுக்கான பாதிப்புகளும் தளத்தில் இல்லை என்று உறுதி செய்யப்பட்டது. மேலும் இணைய பாதுகாப்பு துறையில் பரிட்சயம் உள்ள சில வல்லுனர்களை கொண்டு மீண்டும் சோதிக்கப்பட்டு, தளத்தின் பாதுகாப்பு மேலும் உன்னதப்படுத்தப்பட்டது.

இந்த எச்சரிக்கை செய்தி தொடர்பாக கூகுள் நிறுவனத்தையும் தொடர்பு கொண்டுள்ளோம். அவர்களின் பதிலை எதிர்பார்த்து காத்திருக்கிறோம்.

இந்நிலையில் தமிழிஷ் தளத்தை நாங்கள் கவனத்துடன் கண்காணித்து வருகிறோம். தமிழிஷில் எவ்வித வில்லங்க மென்பொருள்களுக்கான பாதிப்பும் இல்லை என்று உறுதியுடன் தெரிவித்து கொள்ளுகிறோம். எதிர்காலத்தில் வில்லங்க மென்பொருள்களால் தமிழிஷ் தளத்திற்கு ஏதேனும் பாதிப்பு ஏற்படும் பட்சத்தில், அறியப்படும் அந்த வினாடியே, தமிழிஷ் தளத்தின் செயல்பாடுகள் நிறுத்தி வைக்கப்படும். வில்லங்க மென்பொருள்களை நீக்கி பயனருக்கு எவ்வித பாதிப்பும் ஏற்படாது என்று உறுதி செய்த பின்னரே தளம் செயல்பாடுகள் மீண்டும் துவங்கும் என்று உறுதி கூறுகிறோம்.

இந்த சூழ்நிலையில் தமிழிஷ் பயனர்களுக்கு சில வேண்டுகோள்களை வைக்கிறோம்.

தமிழிசை பொறுத்தவரை தளங்களுக்கு வழங்கப்படும் ஓட்டளிப்பு பட்டை தளங்களை வாசிப்போர் தமிழிஷில் அந்த தளத்தினை தேடி ஓட்டளிப்பதற்கு பதிலாக அங்கேயே ஓட்டளிக்கும் வண்ணம் உபரி வசதியாகவே வழங்கப்படுகிறது. ஓட்டளிப்பு பட்டை காட்டாய தேவை கிடையாது. ஓட்டளிப்பு பட்டை தேவை இல்லை என்று நினைப்பவர்கள் அவற்றை நீக்கி கொள்ளலாம். அதற்கும் இடுகைகளை தமிழிஷில் இணைப்பதற்கும் எவ்வித சம்பந்தமும் இல்லை.

நீங்கள் பகிருகின்ற தளம் வில்லங்க மென்பொருள்களால் பாதிக்கப்பட்டு இருந்தால் தமிழிஷில் பகிர வேண்டாம். அவை தமிழிஷில் பகிரப்படும் பட்சத்தில், தமிழிஷ் தளத்தில் இருந்து வில்லங்க மென்பொருள் உள்ள தளத்திற்கு சுட்டி அளிப்பதால் தமிழிஷ் தளமும் பாதுகாப்பற்ற தளமாக கூகிள் போன்ற தேடு எந்திரங்கள் மூலம் கருதப்பட வாய்ப்பு உள்ளது.

எனவே வில்லங்க மென்பொருள்கள் உள்ள தளத்திற்கான சுட்டி தமிழிஷ் தளத்தில் காண நேரிட்டால், பயனர்கள் தயவு செய்து support@tamilish.com என்ற முகவரியில் தெரிவிக்கவும். அந்த தளங்களில் இருந்து தமிழிஷில் பகிர்வதற்கு தற்காலிக தடை விதிக்கப்படும். அந்த தளங்கள் வில்லங்க மென்பொருள்களை நீக்கிய பின் தடை விலக்கப்படும்.

பயனர்கள் தமிழிஷ் தளத்தை உபயோகிக்கும் போது / திறக்கும் போது வில்லங்க மென்பொருள்கள், வைரஸ் அறிவிப்புகள் பெற்றால் உடனடியாக support@tamilish.com என்ற முகவரிக்கு தெரிவிக்கவும். உடனடி நடவடிக்கை எடுக்க அது மிகவும் உதவும்.

இந்த தருணத்தில் சரியான நேரத்தில் இந்த விஷயத்தை எங்கள் கவனத்திற்கு கொண்டு வந்த பதிவர் நைஜீரியா ராகவன், பதிவர் கிரி, பதிவர் கிருஷ்ணமூர்த்தி உள்ளிட்ட அனைவருக்கும் எங்கள் நன்றியை தெரிவித்து கொள்ளுகிறோம்.

இதுபோன்ற வில்லங்க மென்பொருட்களால் பாதிக்கப்பட்ட கூகிள் வலைப்பதிவுகளை மீட்பது குறித்து விரிவான விளக்கம் கூகிள் இணைய தளத்தின் உதவி பக்கங்களில் உள்ளது. கூகிள் நிறுவனத்தின் தானியங்கி சோதனை இயங்கிகளும் சில சமயம் தவறு செய்வது உண்டு. இதனை கூகிள் நிறுவனமே ஏற்றுக்கொள்கிறது. அவ்வாறு நடந்தால், கூகிள் நிறுவனத்தை உங்கள் வலைப்பதிவின் மூலம் தொடர்புகொண்டால், உங்கள் வலைப்பதிவை மீட்டெடுக்க ஆவன செய்வார்கள். இது குறித்து மேலும் விளக்கம் தேவை என்றால் எங்களை தனிமடலில் தொடர்புகொள்ளவும்.

இது தொடர்பாக உங்கள் கருத்துக்களை எங்களுக்கு எழுதுங்கள். மேலும் விளக்கங்கள், உதவிகள் தேவைப்பட்டால் support@tamilish.com என்ற முகவரியில் தொடர்பு கொள்ளவும். உங்களுக்கு உதவி செய்ய காத்திருக்கிறோம்.